XII ENCONTRO DA SGEA

  NON Á DESAPARICIÓN DA EDUCACIÓN AMBIENTAL EN GALICIA

  Santiago de Compostela, 27 de novembro de 2010

  Dende a súa orixe, os “Encontros da SGEA” son os espazos nos que propiciar a participación, o coñecemento e o intercambio de experiencias e saberes entre socias/os e simpatizantes da SGEA; visitamos algún equipamento ou experiencia destacábel, debatemos ou desenvolvemos unha dinámica sobre algunha cuestión en particular e, a fin de contas, compartimos unha xornada na que lecer e coñecemento van da man.

  Mais nesta ocasión, a proposta mudou un pouco; a situación actual da Educación Ambiental en Galicia o esixe.

  Na actualidade, a xa tradicionalmente precaria situación da Educación Ambiental (EA, en diante) en Galicia está a vivir un importante retroceso: recortes en actividades e recursos, peche e infrautilización de Equipamentos públicos, despedimentos e peche de empresas de EA, despilfarro de recursos,....

 Ante esta situación, dende a SGEA propuxemos converter estes XII Encontros nun espazo de reflexión e debate sobre a situación da EA en Galicia, pero sobre todo, nun espazo reivindicativo a través do que manifestar a nosa oposición aos recortes do actual goberno.

  É por este motivo polo que, ademais de todas as socias e socios da SGEA, nesta ocasión queremos facer especial fincapé na participación de todas aquelas persoas, asociacións e entidades máis ou menos ligadas ao medio ambiente e á EA que queiran participar e achegar a súa visión, co obxectivo de construír alternativas colectivas á actual situación.

•   Programa do Encontro

O Encontro celebrarase no Centro de Interpretación de Belvís (http://maps.google.es/maps/ms?ie=UTF8&hl=es&msa=2) A inscrición no Encontro é de balde Prégase a confirmación da asistencia, cubrindo para tal fin a correspondente FICHA DE INSCRICIÓN (www.sgea.org) Para máis información podes contactar connosco no correo sgea@sgea.org, nos teléfonos 981 52 35 56 e 618 86 86 12 ou pasando polo noso local na rúa Voces Ceives, 43, baixo, en Santiago de Compostela

  Para máis información:
Miguel Pardellas (SGEA): 618 86 86 12