O DÍA DO MEDIO AMBIENTE: UNHA XORNADA PARA VESTIRSE DE VERDE?
Un ano máis as distintas administracións gastarán vergoñentas cantidades de diñeiro en actividades puntuais sen ningún tipo de repercusión, nin máis utilidade que a de amosar unha falsa imaxe verde.
Dende 1973, o 5 de xuño de cada ano celébrase o Día Mundial do Medio Ambiente; unha data sinalada no calendario de concellos, consellerías de medio ambiente e ministerios de todos os medios para organizar actividades divulgativas co suposto obxectivo de sensibilizar á poboación fronte aos problemas medioambientais.
Un ano máis, estas actividades convocarán a inxentes cantidades de escolares, suporán un desembolso puntual desproporcionado e servirán unicamente para sacar unhas cantas fotos e repartir gorras, mochilas, camisetas ou globos que, só cun pouco de sorte, estarán feitos con materiais reciclados.
Dende a Sociedade Galega de Educación Ambiental (SGEA) queremos chamar a atención sobre o despilfarro e a inutilidade deste tipo de iniciativas.
Despilfarro porque, nestes tempos de crise, o ámbito da Educación Ambiental non fai máis que sufrir recortes por parte de todas as administracións: os fondos que anteriormente estaban destinados á sensibilización e educación do conxunto da poboación –e non só a escolares– foron os primeiros en desaparecer; porén, ante a posibilidade de quedar ben e poder sacarse unha foto rodeado de nenos e nenas, ningún cargo público parece ter reparos no gasto.
Inutilidade porque a realización dunha actividade dunhas horas, sen traballo previo nin posterior, non pode facer milagres, e moito menos servir de cortiña de fume para a inhibición maioritaria das administracións o resto do ano: promoción do transporte individual coa construción de estradas e autoestradas, permisividade coa urbanización irracional do territorio, pésima xestión das augas e os residuos, despilfarro enerxético, etc.
O deterioro ambiental planetario e o deterioro ambiental de Galicia precisan dunha acción conxunta das administracións e a sociedade civil en prol dunha sociedade máis xusta en responsábel co medio ambiente. Deixemos de malgastar recursos en actos para a galería e traballemos na elaboración de programas, recursos e estratexias ambiciosas e participativas, enfocadas a medio e longo prazo e que promovan cambios reais nas actitudes e nos comportamentos individuais e colectivos da cidadanía.
Aproveitemos o día do medio ambiente para analizar criticamente o traballo desenvolvido ao longo do ano, identificando as eivas e os éxitos mediante un exercicio colectivo de avaliación que nos permita avanzar cara un futuro que aspire realmente a ser máis equitativo e sostible.
Para máis información:
Miguel Pardellas (SGEA): 618 86 86 12
(4-06-10)