OS CONCELLOS GALEGOS DEBATERÁN SOBRE A EDUCACIÓN AMBIENTAL O VINDEIRO 24 DE MARZO

 A SGEA convoca un novo seminario de traballo no CEIDA para traballar cos concellos galegos na elaboración dun plan de acción sectorial para a Educación Ambiental no ámbito municipal.

  A incorporación da Educación Ambiental como instrumento para avanzar cara o desenvolvemento sostible e/ou a sostenibilidade fixo que, cando menos no ámbito formal, se lle veña concedendo unha maior importancia á promoción de iniciativas de Educación Ambiental no ámbito local cada vez que se abordan marcos teóricos, político-administrativos, técnicos e sociais que é preciso ter en conta para introducir nunha comunidade humana pautas concretas de xestión e estilos de vida que aspiren a ser ambientalmente sostibles.

  Por este motivo, a finais de 2007 a Sociedade Galega de Educación Ambiental realizou un estudio sobre a situación da Educación Ambiental nos concellos galegos, no marco dun convenio de colaboración coa Consellería de Medio Ambiente e Desenvolvemento Sostible da Xunta de Galicia.

  Despois do tratamento e o análise dos datos, dende a Sociedade Galega de Educación Ambiental (SGEA) queremos poñer en común aos resultados co conxunto de medios de comunicación galegos para poder así afondar nos puntos febles e puntos fortes identificados.

  Con estes obxectivos, a SGEA convoca a un SEMINARIO DE TRABALLO a todos os concellos galegos, que terá lugar o vindeiro 24 de marzo no CEIDA (Castelo de Sta. Cruz, Oleiros).

  Este seminario quere ser, sobre todo, un punto de encontro e un espazo de debate para todos os profesionais que, dende un posto político ou un posto técnico, teñen algunha relacións co desenvolvemento das políticas ambientais municipais, e especialmente con aquelas relacionadas coa Educación Ambiental.

  A SGEA, como dinamizadora da Educación Ambiental na nosa comunidade, quere contribuír deste xeito á elaboración dun Plan de Acción Sectorial para a Educación Ambiental nos concellos galegos. Para acadalo, exporemos en primeiro lugar os datos recompilados no seu momento para, a continuación definir as liñas de acción que orientarán o traballo a seguir nos próximos anos.

  Para calquera dúbida ou consulta que desexedes facer, estamos á vosa disposición en:

  Sociedade Galega de Educación Ambiental
Travesía de García Prieto, 43, baixo. 15706 Santiago de Compostela
981 523 556 / 618 868 612                sgea@sgea.org

  (22-03-09)