A SGEA CONVOCA O OBSERVATORIO DE EDUCACIÓN AMBIENTAL
Dende a súa posta en marcha, a Sociedade Galega de Educación Ambiental (SGEA) articulou algúns mecanismos de difusión e información, e tamén, xunto con outras entidades, fomentou a creación de foros e espazos para o debate e o intercambio de experiencias en Educación Ambiental.
Na busca dun mellor e maior coñecemento da situación educativo ambiental da nosa comunidade, a SGEA ven desenvolvendo distintas iniciativas de investigación que teñen como fío condutor o Proxecto Fénix, proceso a través do cal podemos informar sobre unha certa panorámica da Educación Ambiental en Galicia. Temos comprobado por esta e outras vías, que a existencia de documentos, entidades, servizos e programas de Educación Ambiental non se traduce nunha participación social (pública e privada) responsábel coas problemáticas medioambientais que nos afectan particular e globalmente.
O decaemento institucional, tanto polos esforzos que seguen sendo necesarios para levar adiante calquera proxecto, como polas resistencias a mellorar a coherencia ambiental do conxunto de accións educativas, fainos incentivar un espazo no que se poidan debater e pensar accións para lograr un reforzo da Educación Ambiental en Galicia.
Como consecuencia, e co ánimo de compartir estas inquedanzas con todas as persoas interesadas na Educación Ambiental, a SGEA fai unha convocatoria aberta ao OBSERVATORIO DE EDUCACIÓN AMBIENTAL para a súa constitución o vindeiro xoves, 5 de febreiro, ás 17:00 horas no noso local sito en Santiago de Compostela.
Esperamos que esta iniciativa te pareza de interese e que poidas acudir.
Atentamente,
Santiago de Compostela, a 20 de xaneiro de 2009
A Xunta Directiva da Sociedade Galega de Educación Ambiental
DESCARGAR PROGRAMA
* Para calquera dúbida e/ou aclaración, podedes contactar connosco a través dos teléfonos 981 52 35 56 ou 618 86 86 12. E a través do correo electrónico sgea@sgea.org.
(26-01-09)